پاکستان دیوالیہ ہونے جارہا ہے، شوکت ترین کا دعویٰ

سابق وزیر خزانہ شوکت ترین نے دعویٰ کرتے ہوئے کہا ہے کہ پاکستان دیوالیہ ہونے جا رہا ہے، نیا الیکشن اور نیا مینڈیٹ ہی ملک کے تمام مسائل کا حل ہے۔

کراچی پریس کلب میں 7 جولائی کو پریس کانفرنس کرتے ہوئے سابق وزیر خزانہ شوکت ترین کا کہنا تھا کہ روس سے تیل لینے پر کوئی پابندی نہیں ہے لیکن موجودہ حکومت امریکا سے ڈرنے کی وجہ سے تیل نہیں لے رہی ہے۔

انہوں نے کہا کہ پی ٹی آئی کی حکومت ہوتی تو عالمی منڈی میں تیل سستا ہونے پر عوام کو فوری ریلیف دیتی۔ حکومت عالمی منڈی میں تیل سستا ہونے پر عوام کو ریلیف دے۔ حکومت پر تنقید کرتے ہوئے شوکت ترین نے کہا کہ مہنگائی کا 14 سال کا ریکارڈ موجودہ حکومت نے توڑ دیا ہے۔

انہوں نے کہا کہ یہ ہمیں نالائق کہتے تھے، یہ خود نالائقوں کی یونیورسٹی کے ہیڈ ہیں، ن لیگ کی حکومت نے اوور کیپیسٹی پہلے ہی کر دی تھی، ن لیگ نے امپورٹڈ فیول پر پاور پلانٹ لگائے۔

پی ٹی آئی رہنما کا کہنا ہے کہ آج ملک میں 8 سے 12 گھنٹے کی لوڈشیڈنگ ہو رہی ہے۔ شہباز شریف نے کہا تھا کہ یکم جولائی سے لوڈشیڈنگ نہیں ہوگی، ہمیں بھی تو مشکلات تھیں، ہم اِدھر اُدھر سے پیسوں کا بندوبست کر کے لوگوں کو بجلی فراہم کرتے تھے۔