چوہدری شجاعت حسین آدھی بات کرکے ہمیں لب کشائی پر مجبور نہ کریں،

علمائے اسلام (جے یو آئی) کے مرکزی ترجمان حافظ حسین احمد نے کہا ہے کہ چوہدری شجاعت حسین آدھی بات کرکے ہمیں لب کشائی پر مجبور نہ کریں، مذاکرات کی جو امانت چوہدری برادران کے پاس ہے اس سے قوم کو آگاہ کریں۔

حافظ حسین احمد نے اپنے ایک بیان میں کہا ہے کہ چوہدری برادران بتائیں ہماری امانت کی کیا پوزیشن ہے؟ ہمیں اپنی امانتیں خطرے میں نظر آرہی ہیں۔

حافظ حسین احمد نے کہا کہ دھرنے کے دوران اپوزیشن کے رہنما پہلے ہی نیم دلی سے ہمارے ساتھ تھے،چوہدری برادران سے مذاکرات کے بعد مزید فاصلہ کرگئے۔

ان کا کہنا ہے کہ چوہدری شجاعت آدھی بات کرنے کے بجائے پورا سچ بتائیں، آدھی بات کرکے ہمیں لب کشائی پر مجبور نہ کریں۔

خیال رہے کہ مسلم لیگ (ق) کے صدر چوہدری شجاعت حسین نے اپنے ایک حالیہ بیان میں مولانا فضل الرحمان کے دھرنے کے حوالے سے اہم انکشافات کیے ہیں۔

چوہدری شجاعت حسین نےکہا ہے کہ کچھ لوگ اسلام آباد میں مولانا فضل الرحمان کے دھرنے پر دھاوا بولنے کے حامی تھے، عمران خان سے جا کر کوئی بات کرنے کو تیار نہیں تھا،چوہدری پرویزالٰہی حکومتی مذاکراتی کمیٹی کے ممبر نہیں تھے جس پر پرویز الٰہی سے کہا گیا کہ وہ عمران خان سے بات کریں۔