ورلڈ کپ 2019 کی جنگ ، شاہینوں کے 15رکنی دستے کا اعلان کردیا گیا

لاہور( امروز نیوز ) ورلڈ کپ 2019 کی جنگ ، شاہینوں کے 15رکنی دستے کا اعلان کردیا گیا ، محمد عامر ، وہاب ریاض ، آصف علی، شاداب شامل ، عابد علی ، جنید خان، فہیم اشرف ، یاسر شاہ کو ٹیم سے آﺅٹ کرکے ورلڈ کپ کے محاذ سے وطن واپس بھیجنے کا فیصلہ کرلیا گیا۔ تفصیلات کے مطابق پاکستان کرکٹ بورڈ کے چیف سیلیکٹر انصام الحق نے لاہور میں پریس کانفرنس کے دوران ورلڈ کپ 2019 کے اسکواڈ میں تبدیلیوں کا اعلان کرتے ہوئے 15 رکنی قومی کرکٹ ٹیم کو حتمی شکل دے دی۔ انضمام الحق نے کہا کہ شاداب خان کو بھی ورلڈ کپ اسکواڈ میں شامل کیا گیا ہے جبکہ ڈاکٹرز نے شاداب کو سو فیصد کلیئر قرار دے دیا ہے اور وہ مکمل طور پر صحت یاب ہیں۔انہوں نے کہا کہ جنید خان، فہیم اشرف اور عابد علی کو ورلڈ کپ اسکواڈ سے ہٹا کر بالنگ لائن میں تجربہ کار کھلاڑیوں کو شامل کیا گیا ہے۔ وہاب ریاض ریورس سوئنگ کرنا جانتے ہیں جبکہ عامر اور وہاب ریاض کی شمولیت سے فاسٹ بالنگ کے شعبہ میں بہتری آئے گی۔چیف سیلیکٹر نے کہا کہ تجربہ کار عامر اور وہاب ریاض کی ٹیم میں شمولیت کا فیصلہ فاسٹ بالرز کی ایک روزہ سیریز میں کارکردگی کے بعد کیا گیا جبکہ عابد علی کو ٹیم میں شامل نہ کرنا ایک مشکل فیصلہ تھا لیکن فخر زمان اور امام الحق مکمل طور پر فارم میں ہیں جبکہ آصف علی کو عابد علی پر ان کی پاور ہٹنگ کی وجہ سے فوقیت دی گئی۔انہوں نے کہا کہ آصف علی کی بیٹی کے انتقال کی وجہ سے انہیں امریکا یا پاکستان جانے کی اجازت ہو گی تاہم ہماری کوشش ہو گی کہ وہ وارم اپ میچز سے قبل واپس آجائیں۔رلڈ کپ کے لیے قومی ٹیم میں سرفراز احمد(کپتان و وکٹ کیپر)،فخر زمان،امام الحق،بابر اعظم، محمد حفیظ،شعیب ملک،حارث سہیل،آصف علی،شاداب خان ،عماد وسیم، محمد عامر،محمد حسنین،حسن علی اورشاہین شا ہ آفریدی شامل ہیں ۔واضح رہے کہ ورلڈ کپ سے قبل پاکستان نے 24 اور 26 مئی کو بنگلہ دیش اور افغانستان کے خلاف ورلڈکپ کے وارم اپ میچز کھیلنا ہیں،افغانستان کےخلاف وارم اپ میچ 24مئی کو برسٹل میں منعقد ہوگا جبکہ بنگلہ دیش کےخلاف 26مئی کو کارڈف میں وارم اپ میچ ہوگا ۔31مئی کو قومی ٹیم ویسٹ انڈیز کےخلاف ٹرینٹ برج میں اپنا پہلا میچ کھیلے گی ،دوسرا میچ 3جون کو انگلینڈ کےخلاف ٹرینٹ برج میں ہوگا ،تیسرا میچ 7جون کو سری لنکا کےخلاف برسٹل میں ہوگا ،چوتھا میچ 12جون کو آسٹریلیا کےخلاف ٹانٹن میں ہوگا ،5واں میچ 16جون کو بھارت کےخلاف اولڈ ٹریفرڈ میں کھیلا جائےگا ،چھٹا میچ 23جون کو ساتھ افریقہ کےخلاف لارڈز میں ہوگا، 7واں میچ نیوزی لینڈ کےخلاف 26جون کو ایجبیسٹن میں منعقد ہوگا ،8واں میچ 29جو ن کو افغانستا ن کےخلاف ہیڈنگلے میں ہوگا جبکہ نواں میچ بنگلہ دیش کےخلاف لارڈز میں5 جولائی کو ہوگا۔