کوئٹہ: بلیک میلنگ اور چائلڈ پورنوگرافی میں ملوث پولیس اہلکار گرفتار

ایف آئی اے سائبر کرائم نے کوئٹہ میں کارروائی کرتے ہوئے بلیک میلنگ ، بھتہ خوری اور چائلڈ پورنوگرافی میں ملوث پولیس اہلکار کو گرفتار کرلیا۔

حکام کے مطابق ایف آئی اے سائبر کرائم سرکل کوئٹہ کو شکایت موصول ہوئی کہ ملزم شکایت کنندہ کی منگیتر کو تصاویر اور وڈیوز کے بہانے بلیک میل کرنے کے علاوہ بار بار رقم کا مطالبہ کر رہا تھا۔

سائبر کرائم سرکل نے کامیاب کارروائی کرتے ہوئے ملزم محمد ارسلان کو گرفتار کرلیا جو بلوچستان پولیس میں کانسٹیبل تعینات ہے۔

ابتدائی تفتیش کے مطابق ملزم کے زیر استعمال موبائل سے بلیک میلنگ کے پیغامات، شکایت کنندہ اور اس کی منگیتر کے علاوہ چائلڈ پورنوگرافی سے متعلق ویڈیوز برآمد ہوئی ہیں۔

ایف آئی اے حکام کے مطابق ملزم کیخلاف پیکا ایکٹ کے تحت مقدمہ درج کرکے مزید تفتیش کا آغاز کردیا گیا ہے۔