پاکستان اور افغان طالبان کا افغان امن عمل مذاکرات بحال کر نے پر اتفاق ،شاہ محمود قریشی

اسلام آباد (امروز نیوز)پاکستان اور افغان طالبان نے افغان امن عمل مذاکرات بحال کر نے پر اتفاق کیا ہے جبکہ وزیر خارجہ شاہ محمود قریشی نے کہاہے کہ پرامن افغانستان پورے خطے کے امن و استحکام کیلئے ناگزیر ہے، پاکستان افغان امن عمل کو کامیاب بنانے کیلئے اپنا مصالحانہ کردار صدق دل سے ادا کرتا رہیگا۔قطر کے دارالحکومت دوحہ میں طالبان کے سیاسی دفتر کے اعلیٰ سطحی وفد نے ملا عبدالغنی برادر کی سربراہی میں وزارت خارجہ میں وزیر خارجہ مخدوم شاہ محمود قریشی سے ملاقات کی جس میں خطے کی صورتحال، افغان امن عمل سمیت باہمی دلچسپی کے امور پر تبادلہ خیال کیا گیا ۔وزیر خارجہ مخدوم شاہ محمود قریشی نے وفد کو وزارت خارجہ میں خوش آمدید کہا۔ شاہ محمود قریشی نے کہاکہ پاکستان اور افغانستان کے مابین دو طرفہ برادرانہ تعلقات، مذہبی ثقافتی اور تاریخی بنیادوں پر استوار ہیں ۔انہوںنے کہاکہ گذشتہ چالیس برس سے افغانستان میں عدم استحکام کا خمیازہ دونوں ممالک یکساں طور پر بھگت رہے ہیں ۔انہوںنے کہاکہ پاکستان، صدق دل سے سمجھتا ہے کہ جنگ کسی مسئلے کا حل نہیں ہے افغانستان میں قیام امن کیلئے مذاکرات ہی مثبت اور واحد راستہ ہے ۔انہوںنے کہاکہ ہمیں خوشی ہے کہ آج دنیا، افغانستان کے حوالے سے ہمارے موقف کی تائید کر رہی ہے ۔مخدوم شاہ محمود قریشی نے کہاکہ پاکستان خوش دلی کے ساتھ گذشتہ چار دہائیوں سے لاکھوں افغان مہاجرین بھائیوں کی میزبانی کرتا چلا آ رہا ہے۔ مخدوم شاہ محمود قریشی نے کہاکہ پاکستان نے افغان امن عمل میں مشترکہ ذمہ داری کے تحت نہایت ایمانداری سے مصالحانہ کردار ادا کیا ہے ۔ مخدوم شاہ محمود قریشی نے کہاکہ پرامن افغانستان پورے خطے کے امن و استحکام کیلئے ناگزیر ہے ۔ انہوںنے کہاکہ ہماری خواہش ہے کہ فریقین مذاکرات کی جلد بحالی کی طرف راغب ہوں تاکہ دیرپا، اور پائیدار امن و استحکام کی راہ ہموار ہو سکے ۔انہوںنے کہاکہ افغان طالبان کے اعلیٰ سطحی وفد نے افغان امن عمل میں پاکستان کے مصالحانہ کردار کی تعریف کی۔فریقین نے مذاکرات کی جلد بحالی کی ضرورت پر اتفاق کیا ہے ۔وزیر خارجہ نے کہاکہ وزیر خارجہ مخدوم شاہ محمود قریشی نے واضح کیا کہ پاکستان افغان امن عمل کو کامیاب بنانے کیلئے اپنا مصالحانہ کردار صدق دل سے ادا کرتا رہیگا۔ ذرائع کے مطابق افغان طالبان نے مصاحتی مذاکرات بحالی رضا مندی ظاہر کی ہے ۔