افغان تنازع کا کوئی عسکری حل نہیں، افغانستان میں امن کو لوٹتے نہیں دیکھنا چاہتے،شاہ محمود قریشی

اسلام آباد(امروز ویب ڈیسک) وزیر خارجہ شاہ محمود قریشی نے کہا ہے کہ اافغان تنازع کا کوئی عسکری حل نہیں،افغانستان تنازع کا بات چیت کے ذریعہ حل ہی پیش رفت کا واحد راستہ ہے، افغان قیادت کو پائیدار امن کے حصول کے لیے اس تاریخی موقع کو ضائع نہیں ہونے دینا چاہیے،امن دشمن خطے اور افغانستان میں امن کو لوٹتے نہیں دیکھنا چاہتے۔ وزیر خارجہ شاہ محمود قریشی نے حزبِ وحدت اسلامی کے سربراہ استاد محمد کریم خلیلی اور ان کے وفد کا استقبال کیا،وزیر خارجہ نے پرامن، معتدل اور خوشحال افغانستان کے لیے پاکستان کی حمایت کے تسلسل کی تجدید کرتے ہوئے کہا کہ پاکستان اور افغانستان کے عوام مذہب،تاریخ،ثقافت اور روایات کے بندھن سے باہم منسلک ہیں،دونوں برادر ہمسایہ ممالک کے درمیان باہمی تعلقات میں مزید استحکام کے لیے پاکستان پرعزم ہے۔وزیر خارجہ نے کہا کہ پاکستان نے ہمیشہ زور دیا ہے کہ افغان تنازع کا کوئی عسکری حل نہیں ہے،افغانستان تنازع کا بات چیت کے ذریعہ حل ہی پیش رفت کا واحد راستہ ہے۔شاہ محمود قریشی نے کہا کہ افغان امن عمل میں اب تاریخی کامیابیوں کے حصول میں پاکستان کے مثبت کردار کو فراموش نہیں کیا جا سکتا۔ استاد کریم خلیلی نے بالخصوص امن عمل اور لاکھوں افغان مہاجرین کی میزبانی میں پاکستان کی مسلسل حمایت پر شکریہ ادا کیا،استاد کریم خلیلی نے نئی ویزا پالیسی کے زریعہ افغان باشندوں کو سہولت فراہم کرنے اور باہمی تجارت کو استحکام دینے کے حوالے سے پاکستان کے متعدد اقدامات کو سراہا۔