سری لنکا کو اب کون سے مشکل اقدامات اٹھانے ہوں گے؟

یونیورسٹی کی طالبہ انجلی واندوراگالا نے بتایا کہ ’وہ (وکرماسنگھے) یہ کہتے ہوئے اقتدار میں آئے تھے کہ وہ راجا پکشے سمیت سب کا احتساب کریں گے۔ لیکن انھوں نے ایسا کچھ نہیں کیا۔ یہ سوچنا مضحکہ خیز ہے کہ لوگ دوبارہ ان پر بھروسہ کریں گے۔

سنیچر کو احتجاج کی منتظم نزلی حمیم نے اراکین پارلیمنٹ سے مطالبہ کیا کہ وہ لوگوں کی بات سنیں اور وکرماسنگھے کو صدارت کی دوڑ سے باہر رکھیں۔ انھوں نے خبردار کیا کہ ’اگر آپ رانیل وکرماسنگھے کو اگلے انتخابات میں اس ملک کے صدر کے طور پر حمایت کرنے جارہے ہیں تو پھر ایسے میں عوام آپ کی حمایت نہیں کریں گے اور آپ کو یہ یاد رکھنا چاہیے۔‘

مظاہرے کے منتظمین نے اس عزم کا اظہار کیا ہے کہ اگر وکرماسنگھے بدھ کو اقتدار حاصل کر لیتے ہیں تو وہ مظاہرے جاری رکھیں گے۔

اس کے لیے ممکنہ طور پر ایک ہی طریقہ یہ ہے کہ وہ معاشی بحران کو حل کرنے کے قابل ہوں، یا کم از کم فیول کی بلاتعطل فراہمی حاصل کر لے۔ لیکن ایسا راتوں رات نہیں ہوگا۔

کچھ لوگوں کا کہنا ہے کہ مظاہرے صرف ایک ایسے وقت میں رکاوٹ اور توجہ ہٹائیں گے جب ملک کو گڑھے سے نکالنے کے لیے اتحاد کی ضرورت ہے۔

ایک قانون ساز نے گذشتہ ہفتے ایک میٹنگ میں منتظمین کو بتایا کہ ’جو بھی اقتدار میں آئے آرگالیا موومنٹ کو اسے قبول کرنا ہوگا۔ آپ احتجاج جاری نہیں رکھ سکتے۔‘

لیکن اہم سوال یہ ہے کہ کیا احتجاج جاری رکھنے کی کوئی منطق بنتی ہے۔

آراگالیا تحریک کی طاقت اس کی بے قائدانہ احتجاج اور اس میں شامل عام شہری رہے ہیں۔ یہ خود بخود بڑے پیمانے پر شروع ہونے والی بغاوتوں کو بہتر بنا دیتی ہے لیکن ایسی تحریک کے خاتمے کی پیشن گوئی یا اسے قابو کرنا مشکل ہو جاتا ہے۔

گذشتہ چند مہینوں میں پُرامن مارچ فوج اور پولیس کے ساتھ انتشار انگیز جھڑپوں میں تبدیل ہو گئے ہیں۔ صرف گذشتہ ہفتے کے دوران مظاہرین نے صدر اور وزیر اعظم کی سرکاری رہائش گاہوں پر دھاوا بول دیا، صدارتی سیکریٹریٹ کی عمارت پر قبضہ کر لیا اور پارلیمنٹ میں داخل ہونے کی کوشش کی۔

اس آرگالیا تحریک کو اب کچھ حلقوں کی جانب سے ردعمل کا سامنا ہے۔

بار ایسوسی ایشن نے گذشتہ ہفتے مظاہرین سے وزیر اعظم کا دفتر خالی کرنے کی التجا کرتے ہوئے کہا کہ وہ ’لاقانونیت یا انارکی کی صورتحال‘ کی حمایت نہیں کرے گی۔ ایک ایمبولنس سروس نے شکایت کی کہ افراتفری کے دوران ان کی گاڑیوں پر حملہ کیا گیا، جب وہ مریضوں کو ہسپتال پہنچانے کے لیے لے کر جا رہے تھے۔

کچھ شہریوں کا کہنا ہے کہ مظاہرین نے سری لنکا کے اداروں کے تقدس کو پامال کیا ہے اور ان سرکاری عمارتوں میں زبردستی داخل ہوئے جو ریاستی طاقت کی علامت سمجھی جاتی ہیں۔

مظاہرین کے ساتھ یکجہتی کے طور پر کچھ کاروباری اداروں نے انھیں کچھ بہت ضروری مالی اعانت فراہم کی ہے۔ لیکن وہ اس پر دوبارہ غور کر سکتے ہیں اگر احتجاج طویل ہو جائے اور معیشت کے عدم استحکام میں اضافہ ہو۔

بی بی سی کے مشاہدے میں یہ بات آئی ہے کہ نجی طور پر، مظاہرے کے منتظمین کو مسلسل خدشہ ہے کہ یہ تحریک مزاحمتی عناصر کی وجہ سے تشدد میں بدل سکتی ہے۔

حالیہ مہینوں میں مظاہرین نے ارکان پارلیمنٹ کے گھروں کے ساتھ ساتھ وکرماسنگھے کی نجی رہائش گاہ اور راجا پکشے کے آبائی گھر کو نذر آتش کیا ہے۔

سیکیورٹی فورسز پر مظاہروں کو روکنے کی کوششوں میں بربریت کا الزام عائد کیا جاتا ہے، جس میں مظاہرین پر گولی چلانا، انھیں بُری طرح زدوکوب کرنا اور بھاری مقدار میں آنسو گیس پھینکنا شامل ہے۔ وہ اب تک سینکڑوں مظاہرین کو زخمی کر چکے ہیں۔

منتظمین اب یہ اُمید کر رہے ہیں کہ جب وہ دباؤ ڈالیں گے تو اس سلسلے میں کمی واقع ہو گی۔

انھوں نے زیادہ تر عمارتیں جن پر وہ قابض تھے خالی کر دی ہیں، اور اب اس بات پر زور دے رہے ہیں کہ وہ صرف پُرامن مظاہروں پر توجہ مرکوز کریں گے۔

بی بی سی کے پوچھے جانے پر کہ کیا ان کے خیال میں احتجاجی تحریک بہت آگے بڑھ گئی ہے، اس احتجاج کے ایک منتظم فادر جیونتھا پیرس نے کہا کہ ’ہم صرف ایک احتجاجی ریلی چاہتے تھے۔ جو ہم نے منعقد کی تھی۔ باقی اس پر ہمارا کوئی کنٹرول نہیں تھا۔‘

ان کے مطابق ’لوگ مایوس ہیں، وہ بدامنی کا شکار ہیں۔ رانیل اس کا براہ راست ذمہ دار ہیں۔‘

انھوں نے کہا کہ وہ غیر پرتشدد مظاہروں کی مختلف شکلوں کا تعاقب کریں گے جیسے مارچ اور ہڑتالوں کے ساتھ ساتھ سرکاری عمارتوں پر قبضہ۔ انھوں نے کہا کہ ’صرف بات یہ ہے کہ ہم عوامی املاک کو کبھی نقصان نہیں پہنچنے دیں گے۔ ہم نہیں چاہتے کہ کسی کو نقصان پہنچے۔‘

لیکن اس سے کوئی فرق نہیں پڑتا ہے کہ آنے والے دنوں اور ہفتوں میں سری لنکا کے سامنے آنے والے مشکل حالات کون سے ہیں، وہ پہلے ہی بہت کچھ حاصل کر چکے ہیں۔

اس بغاوت نے پہلی بار تین بڑی برادریوں۔۔۔ سنہالہ، تمل اور مسلمانوں کو ایک مشترکہ مقصد کے لیے اکٹھا کیا ہے۔ مرد، خواتین، بچے، بُدھ بھکشو، مسیحی، پادری اور راہبہ اور مسلمان تاجر سبھی اس میں شامل ہو گئے ہیں۔

احتجاجی رہنما وساکا جیاویرا نے کہا کہ ’اپنی نوجوان نسلوں کو ہم نے سکھایا ہے کہ وہ پیچھے نہ ہٹیں، آگے بڑھیں گے، وہ تمام مطالبات مانیں گے۔‘

راجا پکشے کے اقتدار کے کئی برس بعد سری لنکا کے عوام نے ناقابل تصور کارنامہ سرانجام دیا ہے۔ انھوں نے اپنے ملک کو راجا پکشے خاندان کی مضبوط گرفت سے باہر نکالا۔

سری لنکا کو راجا پکشے خاندان کی آہنی گرفت سے باہر نکالنے کا ناقابل تصور کام عوامی غصے نے کیا ہے۔

یہ تاریخ میں ایک ایسے لمحے کے طور پر یاد رکھا جائے گا جب عام لوگوں کو اپنے ملک کو آگے لے جانے سے متعلق ایک بڑا مطالبہ کرنے کی ہمت ہوئی تھی۔ سری لنکا کے سیاستدان اب جانتے ہیں کہ اگر وہ کارکردگی نہیں دکھا سکے تو پھر آگے چل کر انھیں کس قسم کے حالات سے گزرنا پڑ سکتا ہے۔