چین مغربی ممالک کے لیے بڑا خطرہ ہے: ٹونی بلیئر

بلیئر نے کہا کہ ’چین نے ٹیکنالوجی کے کئی شعبوں میں پہلے ہی امریکہ کی طرح غلبہ حاصل کر لیا ہے۔ چین اس صدی کی سب سے بڑی جغرافیائی سیاسی تبدیلی کا سبب بنے گا، روس نہیں۔ چینی صدر شی جن پنگ کئی بار تائیوان پر قبضے کا ارادہ ظاہر کر چکے ہیں۔‘

انھوں نے کہا کہ شی جن پنگ کی قیادت میں چین جارحانہ طور پر ’اثر‘ کے لیے مقابلہ کر رہا ہے۔

’چین نہ صرف ہماری طاقت بلکہ حکومتی مشینری اور طرز زندگی کو بھی چیلنج کرے گا۔ ایسے میں مغرب کو اپنی حکومتی مشینری اور اقدار کے تحفظ کے لیے کافی مضبوط ہونے کی ضرورت ہے۔‘

بلیئر نے کہا کہ ’دنیا کم از کم دو قطبی اور ممکنہ طور پر کثیر قطبی ہونے والی ہے۔ جدید تاریخ میں یہ پہلا موقع ہے کہ مشرق مغرب کے برابر ہو سکتا ہے۔‘

’ہمارے پاس ایک بہت بڑا موقع ہے۔ ترقی پذیر ممالک مغربی کاروبار کو زیادہ ترجیح دیتے ہیں۔ پچھلی دہائی کے دوران چین پر ان کا عدم اعتماد بڑھ گیا ہے۔ انھیں مغربی نظام ہماری سوچ سے زیادہ پسند ہے۔‘

خیال رہے کہ ماضی میں چین کی خلیجی ممالک میں زیادہ دلچسپی نہیں رہی لیکن معاشی و سیکیورٹی کے تعاون کے معاملے پر جی سی سی کے رکن ممالک کے ساتھ چین کا رویہ اب بدل رہا ہے۔ امریکہ کے جارحانہ رویے اور ایشیا پیسیفک علاقے میں نئے اتحادیوں کی تلاش کو اگر مدنظر رکھا جائے تو چین اہم شراکت دار کے طور پر سامنے آتا ہے۔

چین اور روس نے گذشتہ سال فوجی مشقیں بھی کی ہیں اور یہ دونوں ممالک کے درمیان بڑھتے ہوئے تعاون کی مزید مثالیں ہیں۔