حکومت کے خاتمہ کی کہانی پنجاب سے شروع ہوگی، بلاول بھٹو زر داری

ساہیوال/سرگودہا (امروز ویب ڈیسک) پاکستان پیپلز پارٹی کے چیئر مین بلاول بھٹو زر داری نے کہاہے کہ حکومت کے خاتمہ کی کہانی پنجاب سے شروع ہوگی ،انشا ءاللہ پیپلز پارٹی دوبارہ اقتدار میں آئے گی ، عوام سلیکٹڈ راج بھگت رہے ہیں اور سلیکٹڈحکومت کولانےوالے بھی پریشان ہیں ، پاکستان پیپلزپارٹی کو ضلع سرگودہا کا مضبوط قلعہ بنائیں گے۔وہ سیال شریف میں صاحبزادہ نعیم الدین سیالوی کی رہائش گاہ پر صحافیوں سے ملاقات میں گفتگو کررہے تھے ۔

بلاول بھٹو زر داری نے کہاکہ موجودہ دور میں زرعی شعبہ تباہ ہوا،کھاد چھین لی گئی، پیپلزپارٹی کل بھی کسانوں کے ساتھ کھڑی تھی اور آج بھی غریب کسانوں کے ساتھ ہے۔ ایک سوال کے جواب میں انہوں نے کہا کہ عوام میرا ساتھ دیں تو سلیکٹڈ حکومت کا راج ختم کرکے عوامی راج لائیں گے۔ بلاول بھٹو زر داری نے کہاکہ ہمیں آنے والی نسلوں کا سوچنا ہے۔ ایک سوال کے جواب میں انہوں نے کہا کہ ہمارے دور کے پچھلے پانچ سال دیکھیں اور موجودہ حکومت کے ساڈے تین سالہ دور دیکھیں تو فرق نظر آجائےگا۔ بلاول بھٹو زرداری نے کہا کہ حکومت کے خلاف تمام آئینی،قانونی، سیاسی ہتھیار استعمال کریں گے

لیکن ہماری کو شش ہے کہ ان ہاﺅس تبدیلی لائیں۔ جلسہ عام سے خطاب کرتے ہوئے بلاول بھٹو نے کہا کہ پیپلز پارٹی کے پانچ اصول ہیں کہ اسلام ہمارا دین ہے، جمہوریت ہمارا سیاست ہے، مساوات ہمارا معیشت ہے، طاقت کا سرچشمہ عوام ہیں اور شہادت ہماری منزل ہے۔انہوںنے کہاکہ ہم سیاست اس ملک کے عوام کی خدمت کرنے کے لیے کرتے ہیں اور ان پانچ اصولوں پر کبھی سودا اور سمجھوتہ نہیں کر سکتے، یہ قائد عوام ذولفقار علی بھٹو اور شہید محترمہ بے نظیر بھٹو کا دیا ہوا نظریہ ہے۔انہوں نے کہا کہ ہم نے وقت کے فرعونوں کا مقابلہ کیا اور اب ہم اس کٹھ پتلی حکومت اور سلیکٹڈ وزیراعظم کا مقابلہ کرنے کے لیے میدان میں نکلے ہیں، ہم اعلان جنگ کر چکے ہیں اور 27فروری کو ہم کراچی سے نکل کر اسلام آباد کا رخ کریں گے

۔چیئرمین پاکستان پیپلز پارٹی نے کہا کہ جب ہم آپ کے ساتھ اسلام آباد پہنچیں گے تو اپنے مطالبات اس حکومت اور پوری دنیا کے سامنے رکھیں گے اور اس ملک کے عوام اس مشکل سے نکالیں گے۔انہوں نے کہا کہ جب سے یہ حکومت آئی ہے، تبدیلی کے نام پر تباہی چل رہی ہے، ہم نے تو پہلے دن سے ان کو سلیکٹڈ کہا، ہم نے ان کو پہلے دن سے ان سے کہا تھا کہ یہ جو آپ آئی ایم ایف کے ساتھ ڈیل کرنے جا رہے ہیں یہ عوام دشمن ڈیل ہے، یہ غریب دشمن ڈیل ہے،

ہماری معیشت اور ہماری معاشی خودمختاری کا سودا ہے، آپ کی نااہلی کا بوجھ اس ملک کا عام مہنگائی، بے روزگار اور غربت کی صورت میں آدمی اٹھائے گا۔انہوںنے کہاکہ تین سال کے اندر یہ حکومت سارے ریکارڈ توڑ چکی ہے، انہوں نے ایک کروڑ نوکریوں کا وعدہ کیا تھا، انہوں نے 50 لاکھ گھروں کا وعدہ کیا تھا، کرپشن سے نجات دلانے کا وعدہ کیا تھا لیکن ان وعدوں کا کیا ہوا۔بلاول بھٹو زرداری نے کہا کہ ایک کروڑ نوکریاں دینا تو دور کی بات کٹھ پتلی نے جن کے پاس روزگار موجود تھا، ان سے بھی روزگار چھینا ہے

، 50 لاکھ گھر بنانا تو دور کی بات، اس ظالم نے ان غریبوں کے گھر سے بھی چھت چھینی ہے، جن کے پاس پہلے سے چھت موجود تھی، انکروچمنٹ کے نام پر ملک بھر میں غریبوں کے سر سے چھت چھینی گئی۔انہوں نے کہا کہ ملک میں ہر طبقہ احتجاج کررہا ہے، کسان احتجاج کررہا ہے کہ اس وقت یوریا کا بحران ہے، کسان کو اپنی فصل کی قیمت نہیں دی جا رہی، جب سے یہ ناکام ترین حکومت آئی ہے، ہماری زراعت کو تباہ کردیا ہے جو ہماری معیشت می ریڑھ کی ہڈی کی حیثیت رکھتی ہے