شوگر مافیا کی وزیراعظم کو دھمکی، قیمتیں بڑھ گئیں

(امروز نیوز)

شوگر مافیا نے وزیراعظم عمران خان اور ایف آئی اے کے ڈائریکٹر جنرل کو چند ماہ قبل چینی کی قیمتوں میں اضافے کی دھمکی دی تھی، اور اب ویسا ہی ہو رہا ہے۔

دی نیوز نے رواں سال 5؍ اپریل کو خبر دی تھی کہ شوگر مافیا نے وزیراعظم عمران خان اور ساتھ ہی ڈی جی ایف آئی اے اور چیئرمین انکوائری کمیشن واجد ضیاء کو خبردار کیا ہے کہ شوگر اسکینڈل کی تحقیقات فوراً روک دی جائیں بصورت دیگر ملک میں چینی کی سخت قلت پیدا کر دی جائے گی اور قیمتیں 110؍ روپے فی کلوگرام تک جا سکتی ہیں۔

شوگر کمیشن کی رپورٹ عوام کے سامنے پیش کر دی گئی تھی اور حکومت نے بھی کمیشن کی سفارشات پر عمل کیلئے ایکشن پلان مرتب کیا تھا، لیکن اس کے باوجود قیمتیں 100؍ روپے فی کلو تک جا پہنچی ہیں اور کچھ علاقوں میں شوگر مافیا کی دھمکی کے مطابق 110؍ روپے فی کلو تک فروخت ہو رہی ہے۔

وزیراعظم کو خبردار کیا گیا تھا کہ اگر شوگر کمیشن نے تحقیقات جاری رکھیں تو ملک میں چینی کا بدترین بحران آ جائے گا۔

یہ خبر دی گئی تھی کہ ڈی جی ایف آئی اے واجد ضیا، جو کمیشن کے سربراہ تھے، سے کہا گیا تھا کہ تحقیقات روک دیں بصورت دیگر چینی کی قیمت 110 روپے ہو جائے گی۔ ڈی جی ایف آئی اے نے وزیراعظم آفس کو اس دھمکی سے آگاہ کیا جو انہیں ملی تھی۔