عدالت نے اداکارہ نادیہ حسین کے شوہر کی درخواست ضمانت پر فیصلہ سنا دیا

لاہور پاکستانی شوبز انڈسٹری کی معروف ماڈل و اداکارہ نادیہ حسین کے شوہر عاطف محمد خان کی جانب سے فراڈ اور غبن کے الزامات میں پولیس کی جانب سے کی جانے والی گرفتاری پر مقامی عدالت نے ضمانت بعد از گرفتاری کی درخواست مسترد کردی ہے۔

رپورٹ کے مطابق عاطف محمد خان نے اپنے وکلاء کے توسط سے ایڈیشنل ڈسٹرکٹ اینڈ سیشن جج (جنوبی) احسان ملک کی عدالت میں درخواست دائر کی تھی۔سماعت کے دوران عاطف محمد خان کے وکلاء نے عدالت کو بتایا کہ وفاقی تحقیقاتی ادارہ (ایف آئی اے) ان کے موکل کے خلاف الزامات کے شواہد پیش کرنے میں ناکام رہا ہے اور ایف آئی اے نے آڈٹ رپورٹس بھی فراہم نہیں کیں۔

وکلاء کے مطابق روایتی تفتیش میں ان اکاؤنٹس کے آڈٹ کا کوئی ذکر نہیں کیا گیا جن سے متعلق ان کے موکل پر الزامات عائد کیے گئے ہیں۔

دوسری جانب نجی بینک کے وکلاء نے عاطف محمد خان کی درخواست ضمانت کی شدید مخالفت کرتے ہوئے عدالت کو بتایا کہ ملزم کمپنی کے چیف ایگزیکٹو افسر (سی ای او) تھے اور وہ کرپشن اور فراڈ میں ملوث ہیں اور انہوں نے کمپنی کے پیسے کو ذاتی کاروبار میں بھی استعمال کیا۔عدالت نے دونوں فریقین کے وکلاء کے دلائل سننے کے بعد نادیہ حسین کے شوہر عاطف محمد خان کی درخواست ضمانت مسترد کر دی۔

واضح رہے کہ نجی بینک سیکیورٹیز میں 64 کروڑ روپے کی خرد برد کا معاملہ سامنے آنے پر ایف آئی اے کارپوریٹ کرائم سرکل کراچی نے سابق سی ای او اور نادیہ حسین کے شوہر عاطف محمد خان کو 08 مارچ 2025 کو گرفتار کرلیا تھا۔

ماڈل نادیہ حسین کے شوہر ملزم عاطف محمد خان کو بطور سی ای او اپنے اختیارات کا ناجائز استعمال کرتے ہوئے مالیاتی دھوکا دہی میں ملوث پایا گیا تھا۔